Апроч шматлікіх адметных культавых аб’ектаў розных адгалінаванняў хрысціянства ўвагу гасцей горада прыцягваюць цікавыя скульптурныя кампазіцыі: помнік у гонар князя Гедыміна, усталяваны побач з Лідскім замкам (мабыць, самы галоўны для ўсіх лідчан), беларускаму першадрукару Францішку Скарыну (устаноўлены ў 1993 годзе з нагоды другой гадавіны незалежнасці рэспублікі), знакамітаму паэту і палітычнаму дзеячу Адаму Міцкевічу (нарадзіўся недалёка ад Ліды на Навагрудчыне), якога лічаць сваім адразу некалькі народаў – палякі, літоўцы і беларусы, памятны валун у гонар заснавання горада, скульптурная кампазіцыя, прысвечаная гербу горада, арыгінальная скульптура сонечнага гадзінніка ў выглядзе трох кітоў, на якіх трымаецца Зямля, а таксама пацешныя жанравыя скульптуры лазеншчыка Васі перад будынкам гарадской лазні і «камандзіровачнага», сімвалічна «ўсаджанага» ля ўваходу ў гатэль.
Аб падзеях і героях Вялікай Айчыннай вайны ў цэнтральным парку Ліды нагадвае Курган неўміручасці, а таксама музей авіяцыйнай тэхнікі пад адкрытым небам, які знаходзіцца на Лідскім аэрадроме. Месца сапраўды гістарычнае, бо самалёты тут лятаюць ужо больш за 100 гадоў і менавіта Лідскі – найстарэйшы дзеючы ваенны аэрадром краіны! Больш за тое, тут дыслакуецца адна з найстарэйшых воінскіх часцей Беларусі – 116-я гвардзейская Чырванасцяжная Радамская штурмавая авіябаза. Яе гісторыя пачалася ў верасні 1941 года ў Маскоўскай вобласці, у кастрычніку 1943-га лётчыкі былі ўзнагароджаны Чырвоным сцягам, а ў 1945 атрымалі ганаровае найменне за паспяховае прыкрыццё войскаў пры вызваленні польскага горада Радама. У гады Вялікай Айчыннай вайны яны ўдзельнічалі ў 519 паветраных баях і збілі 316 самалётаў ворага.
Акрамя таго Ліда – буйны гістарычны цэнтр броварства, а «Лідскае піва» варыцца тут без перапынку ўжо 149 гадоў – з тых самых часоў, як у 1876 годзе прадпрымальны Носель Пупко запусціў сваю хмельную вытворчасць. Таму дзе, калі не ў Лідзе, павінен быў з’явіцца музей, які расказвае пра пенны напой усё-ўсё-ўсё? Увесну 2022 года Музей лідскага бровара прыняў першых гасцей. Акрамя таго, брэндам Ліды стаў яркі музычны фестываль хмеля, соладу і вады LIDBEER, які штогод збірае больш за сто тысяч гасцей з усіх рэгіёнаў Беларусі і замежжа.
Горад Ліда падарыў свету шмат таленавітых людзей. Тут нарадзіліся такія вядомыя людзі, як фізік-тэарэтык, акадэмік АН СССР Аркадзь Мігдал і гісторык літаратуры і літаратурны крытык Пётр Коган, кампазітар Канстанцін Горскі, кінаактрыса Пола Ракса, шматразовы чэмпіён Беларусі па грэка-рымскай барацьбе Валерый Цыленьць.
Калі казаць пра літаратурныя традыцыі Лідчыны, то ў спіс праславіўшых яе пісьменнікаў можна аднесці пачынальніка новай беларускай літаратуры Францішака Багушэвіча, паэтэсу Алаізу Пашкевіч (Цётку), паэта-франтавіка Валянціна Таўлая.
Старажытная гісторыя, сінтэз культур і архітэктурных традыцый, смачнае піва і маляўнічая прырода ў наваколлі – усё гэта робіць горад Ліда вельмі прывабным для гасцей і турыстаў, таму сардэчна запрашаем на Дзень беларускага пісьменства!