У трыццаць першы раз фестываль адзінства друкаванага слова, літаратуры і народа пройдзе ў Івацэвічах – прыгожым гарадку, які ўзнік на месцы шляхецкага маёнтка і стаў адным з самых прывабных гарадоў Брэстчыны. Ён стаіць на беразе маляўнічай рэчкі Грыўда – правым прытоку Шчары, і мае на сваім гербе кветку лілеі на зялёна-залатым фоне – сімвал чысціні і арыстакратызму. «Побач з лясамі, побач з палямі родны наш горад стаіць…» – спяваецца ў гарадскім гімне.
Упершыню Івацэвічы згадваюцца ў дакументах у 1519 годзе як прыватны маёнтак, які належаў магнацкаму роду Сапегаў. Пазней іх змянілі Юндзілы.
Івацэвічы маглі так і застацца шляхецкім маёнткам, калі б у 1871 годзе побач з імі не была пракладзена чыгунка, якая злучыла Маскву з Брэстам. Тут была пабудавана станцыя, вакол якой і стала расці паселішча.
Візітная картка горада – радавая сядзіба Юндзілаў, пабудаваная ў стылі класіцызму яшчэ ў канцы 18 стагоддзя, якая лічылася адной з найпрыгажэйшых у Беларусі. На жаль, з усяго комплексу захаваўся толькі аднапавярховы сядзібны дом, у якім сёння размяшчаецца адзін з карпусоў раённай бальніцы.
У Івацэвіцкім раёне ёсць яшчэ адзін унікальны помнік неагатычнай архітэктуры XIX стагоддзя – гэта палац Пуслоўскіх, таксама вядомы як Косаўскі замак. Размешчаны ён за паўтара кіламетра ад мястэчка Косава, ва ўрочышчы Мерачоўшчына. За казачную выяву і раскошу палац графаў Пуслоўскіх атрымаў назву «рыцарская мроя».
Побач з замкам знаходзіцца музей-сядзіба нацыянальнага героя Беларусі, Польшчы і ЗША, ганаровага грамадзяніна Францыі Тадэвуша Касцюшкі.