Хойнікі як мястэчка вядомыя з сярэдзіны XVI ст., імі валодалі князі Вішнявецкія, Шуйскія, Прозары. У першай палове XVII ст. на невялікай дзюне ў забалочанай пойме ракі Квеся князі Вішнявецкія пабудавалі замак з абарончымі сценамі, уязной вежай-брамай. Замак праіснаваў да XVIII ст.
Гэты горад захаваў традыцыі такіх старажытных рамёстваў, як ткацтва і лозапляценне, вырабы з бяросты і карэнняў.
Хойніцкая зямля дала Беларусі празаіка Барыса Сачанку, паэтаў Міколу Мятліцкага і Алу Канапельку, а таксама Хойніччына – радзіма народнага пісьменніка Беларусі Івана Мележа. Ён нарадзіўся ў вёсцы Глінішча, дзе існуе літаратурны музей пісьменніка. У свой час у краіне былі створаны тэлеспектаклі па раманах «Людзі на балоце» і «Дыханне навальніцы», у тэатрах ставіліся п’есы па творах Мележа. І ўсё ж галоўным дасягненнем «Палескай хронікі» застаецца яе экранізацыя. Фільм Віктара Турава «Людзі на балоце» сабраў мноства ўзнагарод, самая галоўная з якіх – Дзяржаўная прэмія СССР.
Пад час Дня беларускага пісьменства ў Хойніках у 2010 г. адбылася цырымонія адкрыцця скульптурнай кампазіцыі «Па старонках твораў Івана Мележа». Таксама быў адкрыты Дом абрадаў і рэканструяваны комплекс «Сядзібны дом» – архітэктурны помнік XIX – пачатку ХХ ст., у якім размясціліся экспазіцыі мясцовага краязнаўчага музея. На галоўнай сцэне прагучала опера паводле паэмы Янкі Купалы «Курган», якой менавіта ў 2010 г. споўнілася 100 гадоў.