Сярод знакамітых выхадцаў і жыхароў гэтай зямлі – майстар па вырабе кафлі Сцяпан Іваноў, па мянушцы Палубес, Ілля Капіевіч – выдавец і аўтар створанай на заказ Пятра I рускай граматыкі. Тут нарадзіўся і адзін з вядомых беларускіх і рускіх першадрукароў Пётр Мсціславец, які разам з Іванам Фёдаравым заснаваў друкарню ў Маскве і ў 1564 г. выпусціў першую ў Расіі друкаваную кнігу «Апостал». На Беларусі з удзелам Мсціслаўца былі заснаваны Заблудаўская і Віленская друкарні.
Мсціслаўская зямля падарыла нам такія вядомыя імёны, як этнограф і фалькларыст Іван Насовіч; браты Максім і Гаўрыла Гарэцкія – пісьменнік і вучоны-геолаг; браты Адрыян і Мсціслаў Прахавы – вучоныя-гісторыкі. У Мсціслаўскім педагагічным тэхнікуме ў свой час вучыліся паэты Аркадзь Куляшоў і Змітрок Астапенка. У пісьменніка Уладзіміра Караткевіча пра гэты горад напісана цэлая мастацка-дакументальная кніга пад назвай «Мсціслаў».
Падчас святкавання Дня беларускага пісьменства з удзелам Прэзідэнта Рэспублікі Беларусь Аляксандра Лукашэнкі на плошчы горада ўрачыста адкрылі помнік Пятру Мсціслаўцу, які стаў ужо другім помнікам друкару ў горадзе (першы, устаноўлены ў 1986 г., знаходзіцца насупраць езуіцкага касцёла). Скульптура адлюстроўвае Пятра Мсціслаўца ўжо ў сталым узросце, які стаіць з разгорнутай кнігай у руцэ. У бронзавай трохмятровай фігуры першадрукара мастакам удалося паказаць галоўнае – прыгажосць мудрасці асветніка, яго веру ў веліч друкаванага слова і сілу ведаў.