Я.М. Рамановіч – аўтар прац па беларускай дыялекталогіі, гісторыі беларускай мовы, сучаснай беларускай літаратурнай мове, бібліяграфіі беларускага мовазнаўства.
Яўгенія Міхайлаўна займалася стварэннем розных фундаментальных работ, якія праводзіліся ў галіне дыялекталогіі пад кіраўніцтвам загадчыка сектара Ю.Ф. Мацкевіч. Гэта: “Дыялекталагічны атлас беларускай мовы” (1963), выданне “Нарысы па беларускай дыялекталогіі” (1964), “Хрэстаматыя па беларускай дыялекталогіі” (1962), навуковая манаграфія “Лінгвістычная геаграфія і групоўка беларускіх гаворак”, а таксама альбом рэкартаграфічных матэрыялаў, у якім паказана, як суадносяцца паміж сабой па пашырэнні розныя моўныя асаблівасці, характэрныя беларускім народным гаворкам, якія пучкі ізаглос яны ўтвараюць (1968–1969).
Менавіта за ўдзел у стварэнні пералічаных, знакавых для нацыянальнай лінгвівістыкі, культуры прац Я.М. Рамановіч разам з іншымі найбольш актыўнымі даследчыкамі была адзначана Дзяржаўнай прэміяй СССР.
У навуковай бібліяграфіі Я.М. Рамановіч асаблівае месца займаюць публікацыі ў галіне нацыянальнай лексікаграфіі. Яна адзін з удзельнікаў міжнароднага праекта “Слоўнік беларускіх гаворак паўночна-заходняй Беларусі і яе пагранічча” (1979–1986).
На аснове матэрыялаў слоўніка ў наступным падрыхтавала да друку шэраг артыкулаў: “Некаторыя акцэнталагічныя адрозненні ў сучасных беларускіх гаворках” (1966, у суаўтарстве), “Да лексіка-семантычнай дыферэнцыяцыі ў беларускіх народных гаворках” (1971, у суаўтарстве) і інш.
Удзельнічала ў падрыхтоўцы падручнікаў для вышэйшай школы. Сярод іх “Параўнальная граматыка ўсходнеславянскіх моў” і “Курс сучаснай беларускай літаратурнай мовы. Марфалогія” (1957, у суаўтарстве).
У коле навуковых інтарэсаў лінгвіста была таксама і анамастыка. Я.М. Рамановіч з’яўляецца суаўтарам навуковага выдання “Мікратапанімія Беларусі” (1974).
Яна займалася складаннем бібліяграфічных паказальнікаў па беларускім мовазнаўстве (1967, 1980, 1993).
Разам з А.К. Юрэвіч з’яўляецца аўтарам манаграфіі “П.А. Бузук”, прысвечанай навуковай дзейнасці выдатнага беларускага лінгвіста і славіста.
Была ўдзельнікам фундаментальнага даследавання “Лексічны атлас беларускіх народных гаворак : у 5 тамах” (1993–1998).