ВИРТУАЛЬНЫЕ ВЫСТАВКИ - ПЕРСОНАЛЬНЫЕ

Танк, М. Збор твораў : у 13 т. Т. 1. Вершы (1930—1939) / Максім Танк ; Нацыянальная акадэмія навук Беларусі, Інстытут літаратуры імя Янкі Купалы ; рэдактар тома А. Л. Верабей ; прадмова В. В. Зуёнка. — Мінск : Беларуская навука, 2006. — 374 с.

Збор твораў народнага паэта Беларусі Максіма Танка ў 13 тамах падрыхтаваны ў Інстытуце літаратуры імя Янкі Купалы HAH Беларусі ў адпаведнасці з распараджэннем Савета Міністраў Рэспублікі Беларусь, якое вызначае паважлівае стаўленне да творчай спадчыны выдатнага сына беларускага народа, паэта еўрапейскага ўзроўню і маштабу. Максім Танк надзвычай складаны, а таму цікавы для гісторыі літаратуры і нацыянальнай культуры ў цэлым як аўтар, які бесперапынна працаваў над удасканаленнем уласных твораў, як аўтар свайго часу, які эвалюцыяніраваў разам з грамадствам, народам, гісторыяй.
Збор твораў Максіма Танка здзяйсняецца пры адсутнасці папярэдніх навукова-каменціраваных выданняў. У 13 тамах ахоплены ўсе вядомыя (апублікаваныя і выяўленыя ў архівах і прыватных зборах) вершы, паэмы, літаратурна-крытычныя артыкулы, нарысы, пераклады, лісты.
У аснову гэтага выдання быў пакладзены шасцітомны Збор твораў Максіма Танка, апошняе прыжыццёвае выданне творчага набытку паэта, а таксама ўсе прыжыццёвыя зборнікі, якія выйшлі пасля 1980 года.

Танк, М. Вершы / Максім Танк ; прадмова Івана Ралько ; мастак А. К. Лісічнікаў. — Мінск : Народная асвета, 1967. — 228 с.

Жыццё і барацьба працоўных Заходняй Беларусі ва ўмовах буржуазнай Польшчы, нацыянальна-вызваленчы рух і ўз’яднанне беларускага народа ў адзінай Савецкай дзяржаве, Вялікая Айчынная вайна і адбудова краіны, сённяшні дзень знайшлі адлюстраванне ў паэзіі Максіма Танка.

У кнігу "Вершы" ўвайшлі лепшыя творы со зборнікаў "На этапах", "Пад мачтай", "Каб ведалі", "След бліскавіцы", "Мой хлеб надзённы".
Вершы, уключаныя ў зборнік, дадуць вучням пэўнае ўяўленне аб творчасці выдатнага беларускага паэта, яе тэматыцы і асаблівасцях.

Танк, М. Выбранае : вершы / Максім Танк ; прадмова Васіля Зуёнка. — Мінск : Мастацкая літаратура, 1993. — 335 с.

Паэзія Максіма Танка — уся ад зямлі, ад лёсу людскога. Яго вершы адлюстроўваюць уласцівую народу самабытнасць, здзіўляюць багаццем тэм, вобразаў, разнастайнасцю мастацкіх форм, імкненнем ахапіць усю складанасць жыцця. Паэт заўсёды жыве ў самай гушчы падзей, шырока бачыць свет, піша пра тое, што больш хвалюе нашага сучасніка.

Танк, М. Збор калосся : вершы (1983—1988) / Максім Танк. — Мінск : Мастацкая літаратура, 1989. — 302 с. : іл.

Чыстае фальклорнае гучанне, зварот да вытокаў народнай мудрасці, стылёвая дасканаласць з’яднаны ў творчасці народнага паэта Беларусі, лаўрэата Ленінскай прэміі, Героя Сацыялістычнай Працы Максіма Танка з разуменнем паэзіі як найвышэйшай праявы грамадзянскасці.

Завушніцы
О, колькі раз прасіў я
Назначыць мне спатканьне;
О, колькі раз хацеў я
Прызнацца ёй у каханьні!
Ды ўсё перашкаджалі,
Калі дзяўчыне верыць,
То павадак вясновы,
То прымаразак-шэрань...

Танк, М. Дарога і хлеб : лірыка : для дзяцей старэйшага школьнага ўзросту / Максім Танк ; прадмова У. Гниламёдава ; мастак А. И. Аблажэй. — Мінск : Юнацтва, 1988. — 111 с. : іл. — (Паэтычная бібліятэка).

Танк, М. Каб ведалі : вершы / Максім Танк ; пераплёт мастака Е. Тараса. — Мінск : Дзяржаўнае выдавецтва БССР ; Рэдакцыя мастацкай літаратуры, 1948. — 179 с. : іл.

Першы пасляваенны зборнік Максіма Танка "Каб ведалі" з’яўляецца творчым дасягненнем паэта, даўно і слушна прызнаны за адну з самых цікавых з’яў беларускай паэзіі першых мірных гадоў і заслужана адзначаны Дзяржаўнай прэміяй СССР. У зборнік увайшлі вершы, напісаныя Максімам Танкам у перыяд 1945-1948 гг.  Сваiм зместам i пафасам ён цалкам звернуты ў нядаўняе мiнулае, лiрычны герой кнiгі засяродзiўся на асэнсаваннi драматычных i трагічных старонак другой сусветнай вайны.

Танк, М. Ключ журавіны : лірыка / Максім Танк. — Мінск : Беларусь, 1972. — 494 с. : іл.

У аднатомнік народнага паэта Беларусі Максіма Танка ўвайшлі лепшыя лірычныя творы со шматлікіх яго паэтычных зборнікаў: "На этапах", "Журавінавы цвет", "Нарач", "У дарозе", "Глыток вады"...

Рукі маці
Іх цалавала зямля
Сваімі пясчанымі вуснамі
I каласамі;
Неба сьпякотай, вятрамі, дажджамі
Іх цалавала.
Пража нямала
Зь іх выпіла ў ночы бяссонныя
Сьвежасьці раньняй.
Колькі яны запалілі сьвітаньняў,
Зораў над намі...

Танк, М. Листки календаря : дневниковые записи / Максим Танк ; авторизованный перевод с белорусского С. Григорьевой ; стихи перевел Я. Хелемский ; художник А. И. Кретов—Даждь. — Москва : Советский писатель, 1974. — 302 с.

"Листки календаря" - первая прозаическая книга известного белорусского поэта Максима Танка. Это дневник, который охватывает 1935-1939 годы, период, когда Западная Белоруссия находилась под игом панской Польши. Писатель рассказывает о том, что ему самому довелось увидеть и пережить. Легальная работа журналиста и подполье, участие в революционно-освободительном движении, арест и пребывание в тюрьме, встречи со многими людьми - все это положено в основу книги.

Танк, М. Мне пару крыл дало юнацтва… : выбраная лірыка / Максім Танк ; укладанне Вячаслава Рагойшы ; мастак А. І. Цароў. — Мінск : Мастацкая літаратура, 2003. — 479 с. — (Беларуская паэзія ХХ стагоддзя).

У кнігу народнага паэта Беларусі Максіма Танка ўвайшлі ўзоры яго інтымнай, грамадзянская, пейзажнай і філасофскай лірыкі, а таксама асобныя сатырычныя вершы. Творы згрупаваны ў асобныя раздзелы паводле іх жанравай прынадлежнасці, што, апрача ўсяго, дазваляе не толькі лепш задаволіць разнастайны густ шырокага чытача, але і зручней карыстацца кнігай пры вывучэні "праграмных" твораў паэта ў сярэдніх і вышэйшых навучальных установах нашай краіны.

Танк, М. На этапах : вершы / Максім Танк. — факсімільнае выданне. — Вільня : [б.в.], 1936. — 127 с. : партрэт. — Змест: Чорныя скібы ; Акварэлі ; На этапах.

"На этапах" — першы зборнік Максіма Танка. Выдадзены ён у 1936 годзе з дапамогай КПЗБ у Вільні выданнем Васіля Труцькі ў друкарні I. Баеўскага.
Максіма Танка як паэта ведаюць сёння ва ўciм свеце. Яго творчая праца адзначана у нас у краіне самымі высокімі адзнакамі, у тым ліку Ленінскай прэміяй. Ён — народны паэт Беларусі, Герой Сацыялістычнай Працы, дэпутат Вярхоўнага Савета СССР.
Перш чым стаць славутым майстрам слова i выдатным грамадскім дзеячам, Макciм Танк прайшоў шматлікія нялёгкія этапы жыцця. Ён быў камсамольцам-падпольшчыкам у тагачаснай Заходняй Беларусі інструктарам ЦК КСМЗБ, вёў рэвалюцыйную дзейнасць на Віленшчыне i Наваградчыне, неаднаразова пераходзіў мяжу ў Савецкую Беларусь, каб, вярнуўшыся да cвaix землякоў, зноў клікаць іх на барацьбу за ўз'яднанне ў адзінай сям’і савецкіх народаў.
Кнігу "На этапах" склалі лепшыя вершы маладога паэта, а таксама ўрыўкі з ненадрукаванай яшчэ паэмы "Нарач". Амаль увесь тыраж зборніка "На этапах" быў канфіскаваны, засталіся лічаныя экзэмпляры.
Гэта факсімільнае выданне дае магчымасць сучаснаму чытачу нібы зноў атрымаць кніжку ў яе першанараджэнні, удыхнуць таго пераднавальнічнага паветра, разам з аўтарам i яго лірычным героем ступіць на адзін з этапаў барацьбы i змагання.

Танк, М. Паслухайце, вясна ідзе! : вершы, балады, паэмы / Максім Танк ; укладанне і прадмова Вячаслава Рагойшы. — Мінск : Мастацкая літаратура, 1990. — 333 с., [1] л. партр. — (Школьная бібліятэка).

Адрасаваны юнаму чытачу зборнік лаўрэата Ленінскай і Дзяржаўнай прэміі СССР і БССР, Герой Сацыялістычнай Працы Максіма Танка змяшчае вершы розных гадоў і дае яскравае ўяўленне пра творчасць народнага паэта Беларусі. Гуманістычны погляд на чалавека, разуменне ўсіх складанасцей жыцця, разнастайная гама адчуванняў — ад высокага трагізму да светлага гумару — усё гэта знайшло сваё выяўленне ў непаўторным стылі, у арыгінальнасці верша.

Танк, М. Прайсці праз вернасць : вершы і паэма / Максім Танк. — Мінск : Мастацкая літаратура, 1979. — 159 с.

Я спытаў чалавека,
Які прайшоў праз агонь,
І воду,
І медныя трубы:
– Што самае цяжкое
На гэтым свеце?
І ён адказаў:
– Прайсці праз вернасць.
31.1.76

Усхваляваная паэзія Максіма Танка знаходзіць водгук у шырокага кола чытачоў. Яе адметныя рысы — высокая грамадзянскасць, шчырая лірычнасць, надзённасць. Зборнік "Прайсці праз вернасць" — пацверджанне гэтаму. У кнігу ўключана паэма "Мікалай Дворнікаў" — пра слаўнага сына нашага народа.

Танк, М. Янук Сяліба : паэма / Максім Танк. — [Б. м.] : Выдавецтва ЦК КП(б)Б : Савецкая Беларусь, 1943. — 95 с.

Танк, М. Errata : вершы, пераклады / Максім Танк ; мастак Г. Р. Малышаў. — Мінск : Мастацкая літаратура, 1996. — 143 с.

Адну з апошніх сваіх кніг Максім Танк назваў Errata. Гэтаму лацінскаму слову ў нашай мове адпавядае выраз — заўважаныя памылкі. Сімволіка назвы мае перш за ўсё творчае прачытанне — паэт хоча "дапісаць эрату", выявіць і ў памылках знакі паэзіі.
У раздзеле "Дарожныя сустрэчы" змешчаны пераклады.

Танк, М. Блікі сонца : вершы, казкі : для дзяцей дашкольнага і малодшага школьнага ўзросту / Максім Танк ; мастак М. Рыжы. — Мінск : Юнацтва, 1997. — 127 с. : іл.

У кнізе беларускія дзеці, іх мамы, таты, бабулі і дзядулі знойдуць вершы, забаўлянкі-прыбабунькі, якія даўно палюбіліся польскай дзятве. Кніжка таксама будзе карысна выхавацелям дзіцячых садкоў, настаўнікам пачатковых класаў.

Галінка і верабей
– Галінка-вярбінка, –
Прасіў верабей, –
Мо пакалыхала б
Маіх ты дзяцей?
Галінка не хоча
Дзяцей калыхаць.
– Ідзіце, казулі,
Галінку ламаць!

Танк, М. Быліна пра касмічнае падарожжа Мураша Бадзіні : для дзяцей дашкольнага і малодшага школьнага ўзросту / Максім Танк ; малюнкі М. Гуціева. — Мінск : Мастацкая літаратура, 1979. — 13 с.

Танк, М. Ехаў казачнік Бай : вершы і казкі : для дзяцей дашкольнага і малодшага школьнага ўзросту / Максім Танк ; мастак А. Каравай. — Мінск : Юнацтва, 1992. — 32 с.

У кнігу народнага паэта БССР, лаўрэата Ленінскай прэміі, Героя Сацыялістычнай працы Максіма Танка ўвайшлі вершы і казкі: "Журавель і Чапля", "Ірынка", "Бусел", "Жук і слімак", "Конь і леў", "Як вясна прыйшла" і інш.

Ехаў казачнік Бай

— Ехаў казачнік Бай
Цераз сёлы і гай.
Баіць ці не?
— Бай!
— Ён пытаўся ў мяне:
— Што даць дзецям у сне? —
Баіць ці не?
— Бай!..

Танк, М. Журавель і Чапля : казкі : для дзяцей дашкольнага ўзросту / Максім Танк ; мастак В. Славук. — Мінск : Юнацтва, 1998. — 47 с.

Журавель і чапля

Танк, М. Лемантар : вершы : для дзяцей дашкольнага і малодшага школьнага ўзросту / Максім Танк ; рэдактар выдавецтва У. Карызна ; мастак Г. Хинка—Янушкевич. — Мінск : Юнацтва, 1993. — 14 с.

Добры дзень, мой браце юны!
Я прынёс табе як дар
Ад Скарыны-бацькі кнігу —
Беларускі лемантар.
Гэта — ключ ад скарбаў нашай
Мовы матчынай, з якой
Ты не станешся самотнай,
Безыменнай сіратой.
Дык раскрый яго з любоўю —
 Літар стройныя рады
Прачытай і паўтары іх
I запомні назаўжды.

Танк, М. Сярод лясоў наднёманскіх : вершы і казкі : для дзяцей дашкольнага і малодшага школьнага ўзросту / Максім Танк ; мастак В. Шатуноў. — Мінск : Юнацтва, 1987. — 80 с. — (Мая першая кніжка).

Як вясна прыйшла