Мікалай Аляксеевіч Рыжанкоў скончыў Леніградскае Вышэйшае мастацка-прамысловае вучылішча імя В. Мухінай (1960).
Удзельнік мастацкіх выстаў з 1960 г.
Член БСМ з 1966 г.
Працаваў у манументальнай і станкавай скульптуры. Асноўная тэма творчасці – гераічная гісторыя беларускага народа. Творы вызначаюцца свабоднай, але стрыманай мадэліроўкай формаў, разнастайнасцю вобразна-пластычных сродкаў.
Сярод манументальных работ – помнікі ў гонар перамогі рускіх войскаў у 1812 г. на р. Бярэзіне пад Барысавам (1962), Герою Савецкага Саюза Л.М. Даватару ў в. Хоціна Бешанковіцкага раёна (1965), партызану М. Гойшыку ля в. Міхнавічы Івацэвіцкага раёна (1968), манумент у гонар маці-патрыёткі (1975), помнік М. Горкаму ў Мінску (1981), помнік-бюст Герою Савецкага Саюза і Герою Сацыялістычнай Працы К.П. Арлоўскаму ў в. Мышкавічы Кіраўскага раёна (1977).
Аўтар станкавых кампазіцый "Вайна 1812 г." (1962), "Партызаны" (1964), "Дзеці" (1965); рэльефаў "Шлях героя" (1967), "Навекі разам" (1882), двойчы Героя Савецкага Саюза К.К. Ракасоўскага (1985) і інш. Стварыў шэраг памятных медалёў.
8 снежня 1994 г. М.А. Рыжанкоў памёр.
Літаратура:
- Родам з Чавускага раёна // Іскра (Чавусы). — 2002. — 19 кастрычніка. — С. 2.
- Рыжанкоў Мiкалай Аляксеевіч // Беларуская энцыклапедыя: у 18 т. / рэдактар Г. П. Пашкоў. — Мінск, 2001. — Т.13. — С. 492.
- Рыжанкоў Мiкалай Аляксеевіч // Беларускі Саюз мастакоў: энцыклапедычны даведнік / складальнік Б. А. Крэпак. — Мінск, 1998. —С. 462.
- Строгіна, С. Рыжанкоў Мiкалай Аляксеевіч / Святлана Строгіна // Строгіна, С. Сучаснае выяўленчае мастацтва Магілёўшчыны: зборнік артыкулаў / Святлана Строгіна. — Мінск, 2009. — С. 141—142.
- Чубакоў, С. След на зямлі / С. Чубакоў // Культура. — 2002. — 16 сакавіка.— С. 8.